Швейцариялық жазушы Йоханна Спири (1827–1901) Хирзель қалашығында дүниеге келген. Жазушының шығармашылық мұрасында елуге жуық туынды бар. Солардың ішіндегі ең танымалы – «Хайди». «Хайди» хикаяты әлемдік балалар классикасының мойындалған жауһарларының бірі. Бұл – Швейцария тауларында атасымен бірге тұратын кішкентай қыз туралы оқиға. Шығарма 1881 жылы тұңғыш рет жарық көріп, бірден кеңінен танылды. Бірнеше еуропа тіліне аударылып, сан мәрте қайта басылды. «Хайди» тарихы тоғыз рет экранға шығарылған (ең танымал фильмі 1937 жылы түсірілген). «Хайди немесе сиқырлы аңғар» повесі – баланың мейірімі мен табиғаттың шипалы күшін суреттейтін әсерлі шығарма. Шығарманың басты кейіпкері – көңілді де аңқау(ақжарқын), жүрегі таза қыз Хайди. Ол ата-анасынан ерте айырылып, Швейцария Альпісіндегі алыстау тауда тұратын тұйық мінезді атасының қолына келеді. Алғашында қатал көрінген атасы мен қатаң тау тіршілігі Хайдиге бірден ұнайды, ол тау табиғатын, еркіндікті, ешкі бағатын досы Петерді, таудағы тыныш өмірді шексіз жақсы көріп кетеді. Хайди сол сиқырлы аңғарда жүріп адамға деген мейірімділіктің, қарапайымдылықтың, ең- бексүйгіштіктің, табиғатқа жақын болудың қуанышын сезінеді. Алайда тағдыр оны қалаға – мүгедектер арбасына таңылған Клара есімді қызға серік болуға алып келеді. Хайди мен Клараның арасындағы достық, Хайдидің аңғарға және сол жерде өмір сүретін адамдарға деген сағынышы, тауға қайта оралғандағы қуанышы арқылы автор балалықтың пәктігін, шынайы достықтың күшін және адамды емдейтін – табиғат пен сүйіспеншілік екенін көрсетеді. «Хайди немесе сиқырлы аңғар» – балаларға да, ересектерге де жақын, жанды жылытатын, адамгершілікке, табиғатты сүюге, жақындарға қамқор болуға үндейтін тәрбиелік мәні зор туынды. Барша оқырман қауымға арналады.