Данияр Жігітбектен кітап оқуға оңтайлы 8 әдіс
0

Данияр Жігітбектен кітап оқуға оңтайлы 8 әдіс

10 Маусым 2021

1. «Қазір істерімді реттеп алайын, сосын кітап оқуға отырамын» дейміз. Олай болмайды екен. Кітапқа жете алмай қаласыз. Кезекте, жолда кептелісте тұрған кезде оқи беру керек. Бір бет болса да, оқылсын. Оқуды бастап кетіңіз. Ары қарай кітаптың қызығына қалай кіріп кеткеніңізді байқамай қаласыз.

2. Адамдар кітапты әр түрлі мақсатта оқиды. Біреу дүниетанымын кеңейтуді қаласа, біреу сөздік қорын арттыруды көздейді. Тағы біреу білімін толықтырғысы келеді. Ең өнімді кітап оқу тәсілі ол – сұраққа жауап табу үшін оқу. Оқулықтағы материалды бастан-аяқ оқып шығу қиындық туғызса, соңындағы сұрақтарға қараңыз. Соларға жауап табу үшін оқыңыз. Оқу жылдамдығы артады. Сондай-ақ материал сіңімді болады.

3. Жылдам оқудың бір қарапайым тәсілі бар. Кітап оқығанда, қарындаш не қаламмен жүргізіп отырыңыз. Бұл оқу жылдамдығын 1,5 есе арттырады. Әрі көзіңізге көп салмақ түспейді.

4. Кітабыңыз үнемі жаныңызда болсын. Бір жерге барсаңыз, кітабыңызды тастамаңыз. Қолыңыз қалт етсе, кітабыңызды алып, оқи кетіңіз. Том-том кітаптардың қалай тез оқылып біткеніне таңқаласыз.

5. Өзгелермен жарысып оқыңыз. Жеңіске жетсем деген талпыныс адамның табиғатында бар. Кітап оқу сияқты игі істе неге жарыспасқа? Оның үстіне жеңімпазға арнайы сый тағайындалса, бұл қосымша ынталандыру болар еді. Жарысам деп жүріп, кітап оқуды әдетке айналдыра аласыз.

6. Кітап оқып отырғанда, көңіліңіз басқа жаққа ауып кетпеу үшін «қызанақ теxникасы» («помидорная теxника») деп аталатын әдісті қолдансаңыз болады. Ол үшін телефонды авиарежимге қойып, таймерді, мысалы, 20 минутқа баптайсыз да, кітап оқуға кірісесіз. 20 минуттан соң 5 минут үзіліс жасауды алдын-ала жоспарлап қоясыз. Яғни, 20 минуттық жұмыстан соң 5 минуттық демалыс болады. Бұлай істеудің бір пайдасы: кітап оқу барысында «телефонды қарап көрейін» дегендей ойлар пайда болса, «қазір 20-ақ минут шыдасаң, демаласың ғой» деп өзіңізді тежей аласыз. Қандай жылдамдықпен оқысаңыз да, осы 20 минут бойы кітаптан бас алмауыңыз керек. Уақыт біткенде, 5 минуттық үзілісте телефоныңызды қарап алыңыз, су ішіп келіңіз, жаттығу жасаңыз, т.б. Сосын осы циклды (20+5) бірнеше рет қайталасаңыз, кітап та жақсы оқылады, көңіліңіз де сейіле бермейді, біраз энергияңыз да үнемделеді. Қысқасы, еңбегіңіз өнімді болады.

7. Кітапты оқымастан бұрын «Мен бұл кітаптан не алғым келеді?» деп, мақсатыңызды айқындап алыңыз. Мақсатсыз оқылған кітаптың пайдасы аз. Мысалы, біреу «Абай жолын» сол кездегі қазақтардың тұрмыс-тіршілігін, мәдениетін түсіну үшін оқыса, басқа біреу сөздік қорын байыту үшін оқиды. Жазушылыққа қызығып жүрген тағы біреу автордың стилін үйрену үшін оқуы мүмкін. Бір кітап, 3 түрлі мақсат.

8. Кітап оқып отырғанда бәрін түсінесің. Бірақ кітап бетін жапқаның сол екен, бәрін ұмытып қаласың. Олай болмау үшін оқып жатқан дүниең сенің өміріңде қалай көрініс табады, соған мән бер. Сол кітаптың негізгі кейіпкері өзің бол. Бәрін образды түрде қабылдау керек. Сонда ақпарат сіңімді болады. Мысалы, «Пять языков любви» деген кітапты оқып жүргенде мен айналамдағы адамдардың «махаббат тілін» зерттей бастадым. Бір нәрсеге басқа қырынан қарасаң, қызық қой. Кітаптағы мысалдарды өз өмірімнен көруге тырыстым. Нәтижесінде өзім үшін біраз жаңалық аштым. Кітап пайдалы болды деп ойлаймын. Алған білім есте жақсы сақталды және оны өзгелерге айтып бере алдым.

“Лайфхактар” кітабынан үзінді.