Ғалымдар осы күнге дейін мидың барлық құпиясын толығымен ашқан жоқ. Десе де мидың қабілетін, қалай жұмыс істерін зерттеу арқылы біршама қорытындыға келді. Ми арқылы біз көңіл-күйімізді басқарып, өзге адамның қандай әрекет жасайтынын алдын-ала сезе аламыз. Мидың көптеген қабілетін ашу үшін бірнеше жаттығулар мен стратегияны білу қажет. Миға арналған жаттығулар мен стратегияны арнайы кітаптардан табуға болады. 

1. “Ғажайып ми”. Авторы педагог-психолог Мадина Жумадиллаева. Кітап “ми өзгерсе, өмір қалай өзгереді?” деген сұраққа жауап береді. Миды дамыту үшін қандай тағамдардан бас тартып, қандай тағамдарды жеген дұрыс, қалай өмір сүру керегін кітапта толық ашып өтеді. Миды және есте сақтау қабілетін дамытудың әртүрлі әдіс-тәсілдері мен Доротея Бранд тәсілдері, 50/50 әдісі, Франц Лезер әдістері және тағы басқа 30 күнге арналған жаттығулар келтірілген. Қазақ тілінде мидың құрылымы туралы жазылған тұңғыш кітаптардың бірі. 

2. “Икемді ақыл” (Гибкий ум). Авторы Эстанислао Бахрах. Ғалымдар адам миы өмір бойы дамып отыратынын дәлелдеді. Демек, мимен жұмыс істеуге ешқашан да кеш емес. “Икемді ақыл” кітабы мидың тыныш күйін қартайған шаққа дейін сақтауға көмектеседі. Сонымен қатар, шытырман идеяларды жүзеге асыруға, шығармашыл белсенділікті ашуға жәрдем етеді. Кітапта көрсетілген әдістерді дұрыс қолданып, техниканы меңгерер болса әр адам креативті бола алады.

3. “Ми ережелері. Ми туралы сіз және балаларыңыз не білуі қажет?”. Авторы Джон Медина. Профессор Джон Медина мидың жұмыс істеу механизмі туралы 12 қағида дайындадым деп жазған. Бұл қағидаларды күнделікті, оқуда, жұмыста, қарым-қатынаста қалай қолдану керегі туралы айтқан. Автордың айтуынша, қазіргі кезде біз өзімізге физикалық, рухани ауырлық түсіреміз, бұның бәрі мидың жұмысына тікелей әсер етеді. Стресс, ашу, ұйқы, тамақтану бәрінің миға қатысы бар екенін көрсетеді.

4. “Мидың дамуы” (Развитие мозга). Авторы Роджер Сайп. Кітап жылдам оқуға, оқыған дүниені есте сақтауға, қойған мақсатқа жете білуге дағдыландырады. Мидың дамуына көмектесетін тест, автордың ұсынған жаттығуларын таба аласыз. Қолыңызға қалам алып, кітапта жазылған жаттығуларды орындауға кірісіңіз. Көп ұзамай жаңа деңгейге көтерілесіз. Ойыңызды босатып, миыңыздың демалуына көмектесіңіз.

5. “Инкогнито. Мидың тылсым өмірі”. Авторы танымал нейробиолог Дэвид Иглмен. Біздің түйсігіміз қалай жұмыс істейді? Көлікпен келе жатқанда апат боларын сезсеңіз, қалай аяғыңыз автоматты түрде тежегішті басады? Құпияны сақтау неге қиын? Өз-өзіңе қалай ашулануға болады? Бұл сұрақтың бәріне логикалық парадокс, оптикалық иллюзиялар арқылы автор сізге жауап тауып береді. Өзіңізге, әлемге, адамдарға деген көзқарасыңыздың өзгеруіне дайын болыңыз.

6. “Ыңғайлы сана” (Гибкое сознание). Авторы Кэрол Дуэк. Бұл кітап ересектер мен балалардың пстхологиялық дамуына жаңа көзқарас сыйлайды. Автордың айтуынша, адамдар екіге бөлінеді. Біріншісі ақыл, талант адамда тумасынан беріледі дейді. Екіншісі, кез келген қабілетті дамытуға болады деп есептейді. Кітап бірінші түсініктен адамды шығарып, бізді жұмыста, кәсіпте, оқуда жетістікке жетуге көмектеседі.

7. “Ми кедергісі” (Мозг с препятствиями). Авторы Тео Цаусидис. Сіз кейбір адамдардың жетістікке жетіп, кейбірінің мүлде жолы болмайтынын байқайсыз ба? Неге біреулер дереу беріле салады, ал өзгелер мақсатына жетпей қоймайды? Бұл кітап сіз және сіздің мақсатыңыз жайлы. Сіздің жетістікке жетпеуіңіздің 7 себебі жазылған. Кітап кедергінің бәрі басымызда екенін көрсетеді. Бұл кітап жетістікке жетудің құпиясын бөліседі.

Мақала авторы: Жадыра Жанарбек