Жұмысқа орналасқымыз келеді. Түйіндемені жоғары деңгейді дайындап қоямыз. Алайда жұмысқа орналасу үшін көп жағдайда түйіндеме аздық етеді. Жұмысқа қабылдаушы сізден ілеспе немесе мотивациялық хат сұратпаса да, түйіндемеге қосып жіберуді ұмытпаңыз. Бұл сіздің жұмысқа деген жауапкершілігіңізді, өзге бәсекелестерден озық тұруға көмектеседі.

Ілеспе немесе мотивациялық хат жолдауда біз жіберетін 6 қателік бар. Олар қандай?

1. “Мен кішкентай кезімде…”. Ілеспе хатта өмірбаяныңыз, кішкентай кезіңізде қандай болғаныңыз мүлде қажет емес. Қазіргі қабілетіңіз балалық шағыңызда ашылған болса да, оның қазір ешқандай маңызы жоқ. Жұмысқа қабылдаушы үшін сіздің қандай қабілетке ие екеніңіз, қазір қолыңыздан не келетіні, тәжірибеңіз актуалды. Сонымен қатар, түйіндемеде жазған дүниенің бәрін ілеспе хатқа жазудың қажеті жоқ. Түйіндемеңізден онсыз да оқып алады. 

2. “Мені жұмысқа қабылдамасаңыз түсіністікпен қараймын, себебі менің портфолиом расымен мықты емес”. Сізге ешкім аяушылықпен қарамасын. Бұған жол бермеңіз. Тіпті сіздің мүлдем тәжірибеңіз болмаса да, портфолио нашар болса да, қолыңыздан көп дүние келмесе де өзге адам сізді аяп, мүсіркеуіне мүмкіндік бермеңіз. Жұмысқа қабылдаушы үшін ең бастысы оның проблемасын шешіп беру. Өзіңізді төмен көрсетіп жұмысқа қабылдана алмайсыз. Дәлелмен, нақты сөйлеуге дағдыланыңыз. Бұл сіздің жұмысқа қабылдаушымен арада белгілі бір арақашықтық ұстануға көмектеседі.

3. “Менің айлығым 120 мыңнан жоғары болса деймін”. Ілеспе хатта жұмысқа деген қызығушылықты көрсету аса маңызды. Сіз айлық жалақыны көздеп бара жатқандай, бар мотивацияңыз тек ақша секілді әсер қалдырмауыңыз керек. Жұмысқа қабылдаушы тараптан бұл сұрақ болмаса, оны ілеспе хатта жазудың қажеті жоқ. Сізді жұмысқа қабылдауға шақырып жатса, жалақыны сол кезде талқылай аласыздар. 

4. “Маған сіз ұсынған жұмыс кестесі ыңғайлы, мені жұмысқа аласыз ба?”. Егер жұмысқа өз қызығушылығыңыз бойынша орналасқыңыз келсе, бұл туралы жұмысқа қабылдаушыға айтпағаныңыз абзал. Сіздің мақсатыңыз - сапалы, білікті маман ретінде өзіңізді сата білу. Сіз қалаған жұмыс орнында керемет мүмкіндік болғаны үшін келсеңіз, жұмысқа қабылдаушыны қызықтыра алмайсыз. Хатта ең бастысы кәсіби жағыңыз жайлы айтыңыз.

5. “Ескі жұмысымда мені жақтырмады, сол себепті жаңа жұмыс іздеп жүрмін”. Алдыңғы жұмысыңызға, әріптестеріңізге шағымданудан асқан жаман нәрсе жоқ. Ілеспе хатта экс-басшыңызбен, бұрынғы жұмыс орныңызбен қандай қарым-қатынаста болғаныңыз, ол жұмыстан неге шығып кеткеніңіз мүлдем қажет емес. Бұл сізді артық етіп көрсетпейді. Ондай маңызсыз дүние жазғанша, қалай пайдалы боларыңызды жеткізіңіз.

6. “Сіздерде жұмыс істеуді өте қатты қалаймын”. Жұмысқа деген тым артық қызығушылық кері әсер етуі мүмкін. Ал бұл сіздің айлық жалақыңыздың аз болуына әкеп соғуы ғажап емес. Сіз қабілеті бар маман ретінде жұмыс іздеп келіп отырсыз. Ешкімге жалынуға, қажетсіз өтінуге міндетті емессіз.

Бұл ілеспе немесе мотивацияық хатта жіберетін үлкен қателердің бірнешеуі. Бұдан да өзге артық жазбалар кездеседі. Ең бастысы, өзінің қабілетіне сенетін, маман ретінде өзін жоғары ұстайтын жан болыңыз.

Дереккөз: budujobs
Мақала авторы: Жадыра Жанарбек