Тұлғалық дамудың алғышартының бірі-денсаулықты сақтау, денені шынықтыру. Көктем келіп, күн жылынғанда көпшіліктің қалауы жүгіруге түседі. Алайда жүгіруі қалай бастау қажет, күнделікті әдетке айналдырудың жолдары қандай деген сұрақпен бас қатырады. Олай болса жүгіруді бастаудың жазылмаған заңы мен құпиясын бөлісейік.

Жүгірмес бұрын ең алдымен “қай жерде жүгіремін?” деген сауалға жауап тауып алған абзал. Өзіңізге қолайлы, ауасы таза, кедергісіз жол болуын қадағалаңыз. Сонымен қатар, марафонға қатысатын Space Team командасы жүгіретін жер жазық болу қажет дейді. Үйге, жұмыс орынға жақын болса тіпті керемет. Олардың айтуынша, демалыста күнде жаттығатын орынды көрінісі әдемі, ауасы таза жермен алмастырған жөн. Мысалы, Алматыдағы Президент паркі, Ботаника бағы.

Екінші маңызды мәселе спорттық киім, жүгіруге қажет құрал-жабдық. Бастысы киім жүгіруге, қозғалуға ыңғайлы болуы қажет. Аяқ киімнің табаны икемді, протекторы жақсы болғаны маңызды. Өзіңізге жүгіру кезінде не көмектесе алатынын анықтаңыз. Баяу әуен, подкаст, күй тағы басқа тыңдағыңыз келген жинақты дайындап алыңыз. Ритм жүгіру кезінде өзіндік атмосфера сыйлайды.

Жүгіруді қалай бастаймыз?

Жүгіру сіз үшін қиын болса, ұзақ уақыттан беру жүгірмеген болсаңыз ең алдымен жүруден бастаған абзал. Алғашқы бір апта күніне 10 000 қадам жүруге тырысыңыз. Бұл процессті тұрақты түрде қалыптастырсаңыз жүгіруге өту қиындық туғызбайды. Жеңіл атлетикадан спорт шебері, марафоншы, Instarun жүгіру мектебінің негізін қалаушы Артем Куфтырев жаңадан жүгіріп бастаудағы қателікті айтып өтті.

“Алғаш рет жүгіріп бастағандар жаңа сезімнен қорқады: тамыр соғысы мен тыныс алу ырғағы артады, қысым, қан айналымы күшейеді, мүмкін, түсініксіз жайт пайда болады. Адам денесі жаңа жұмыс режиміне бейімделуге тырысады, бірақ бұл біраз уақытты қажет етеді. Егер сіз аздап шыдасаңыз, ол жұмыс істейді және сізге оңай болады”,-деп жазды жеңіл атлетикадан спорт шебері.

Жүгіру кезінде жақсы нәтижеге жетуді қаласаңыз ақырындап уақытты ұлғайтып отырыңыз. Бастапқыда 3 минут жүгіріп, 2 минут жүріп көріңіз. Бұл әдіс сізге ыңғайлы болса келесі жоспарды қолданыңыз:

1 апта: 3 минут жүгіру, 2 минут жүру - 6 серия (30 минут).
2-апта: 4 минут жүгіру, 2 минут жүру - 5 серия (30 минут).
3 апта: 5 минут жүгіру, 2 минут жүру - 4-5 серия (28-35 минут).
4 апта: 5 минут жүгіру, 1 минут жүру - 5 серия (30 минут).
5 апта: Толық 30 минут жүрусіз жүгіру.
6-апта: 35 минут жүгіру.
7 апта: 40 минут жүгіру.
8 апта: 45 минут жүгіру.

Тұрақты түрде жүгіруді қолға алсаңыз, ішкі, сыртқы организмнің қалай өзгеріп жатқанын байқауға болады.

Дереккөз: baribar.kz, lifehacker.ru.