“Kitapal” интернет дүкені Алматы қаласындағы үшінші нүктесін ашты. Ашылу салтанатына кәсіпкер Сырымбек Тау, копирайтер Данияр Жігітбек, Forbes.kz бас редакторы Бақытжан Бұқарбай, Марзия Бекайдар, Ғани Байғалиұлы, Жеңіс Есенкелді, тағы басқа белгілі тұлғалар қатысты.

“Kitapal” интернет дүкенінің негізін қалаушы Махмутов Абдулазиз үшінші дүкен ашу жоспары бұрыннан болғаны туралы айтты. Алайда пандемияға байланысты осы жылға қалған.

“Әр нәрсенің өз уақыты болады. Үшінші дүкен ашуға мүмкіндік осы жылы туды. Негізгі ой 2018 жылы дүкен ашылған кезде туған еді. Алдағы уақытта Қызылорда қаласында төртінші дүкен ашылады. 2021 жылғы басты жоспарымыз басқа қалаға шығу болып тұр. Үшінші дүкеніміз үлгі ретінде ашылды деуге болады”,-деп түсіндірді.

Кітап дүкенінің бренд амбассадорлары “Меломен” тобының солисі Ғабит Әбілдаев пен жары, блогер Нұрила Ақберген атанды. Ғабит Әбілдаевтің айтуынша себепсіз ештеңе болмайды. “Меломен” тобының директоры Арман Саясиұлы кітап дүкенімен алтын көпір бола білген екен. Жарты жылдан бері бренд амбассадор атанған жұлдыз жұп “кітапты өмір бойы жарнамалауға болады” дейді. Кітап оқу арқылы адам өзін толыққанды сезінеді, ойын еркін жеткізе алады. Кітап-рухани азық. Сол себепті де Ғабит Әбілдаев пен Нұрила Ақберген тек осы жылы емес, арықарай да дүкенді жарнамалауға дайын екенін айтты.

“Жарнаманы қажет етпейтін кітапты өмір бойы жарнамалау қажет. Біз бренд амбассадор болу арқылы көп нәрсе түйдік. Жауапкершілікті сезініп, жан-жақты іздене бастадық. Аз уақыттың ішінде біршама дамыдық, ара-қатынасымыз жөнделді, балаларға кітап оқып беретін болдық. Жақсы қасиеттерді бойымызға жинап келеміз. “Kitapal” бізге өмірдің құндылығын түсіндіре білді”,-деп пікір білдірді Ғабит Әбілдаев.

“Kitapal” дүкенін Алматы қаласында Мақатаев 128А, 5 мкр 18-үй және жаңа дүкенді “Үшсұңқар” сауда үйі, 2-қабаттан таба аласыздар.